小一，我嘅年代小一係天真無邪弱弱地智嘅時代，邊有好似而家啲小朋友咁早熟。。。。我嘅第一次觸電就係係呢個時候發生。
細節好似好模糊，但印象實在太深，第一次知道乜野係鍾意一個人，第一次感受到離別嘅苦，當時太細，佢就係我全世界，以為佢無當我係一回事，但後來多年後先發覺我太睇少呢段所謂puppy love......
終於大個仔啦！當日升做小一雞以為自己大個了，第一日就同個超超超超靚可愛極品同班，我著迷了。但因不知愛為何物，只係知道想望佢，想接近佢。。。。總之就係傻仔咁。記憶中我有好幾個情敵，大家都會送野俾呢個女仔。而我嘅禮物，諗起真係無得頂，係教人砌機械人模型嗰張紙，無睇錯，係每盒模型都一定會有教你點砌嗰張紙。因當年我極度迷戀模型玩具，自自然會當左呢啲野係寶，我將我覺得係寶嘅野送禮俾小女神係理所當然嘅事，哈哈哈。。。當然，佢收收埋埋其實我唔知佢有無掉到，但人生第一次送野俾女仔就係膠成咁，諗起得啖笑。
後黎，有一次，機會黎啦，班調位佢竟然坐係我隔離！嗰時係5到6張枱拍埋咁大家圍埋咁一枱做一個單位，成個班房就分開4至5個咁嘅單位，好似擺酒咁。同枱嘅有佢之餘仲有一個好出名嘅弱智兒童。佢係堅弱智嘅，當年嘅教學配套可能唔係咁好，無所謂特殊學校？總之佢係痴得好厲害，由朝到晚絕大部分時間都係度liu鼻屎，係流住口水笑住口咁起勢咁Liu, 訓導主任日日都叫佢拎返隻手出黎，一行開佢又liu過。好自然，佢就成為左同學間恥笑嘅對象，但係當年我嗰班，只係笑吓佢咁，絕無話去到欺凌嘅層面。雖然佢日日俾人笑，又無乜人埋佢身，佢玩鼻屎亦都玩得不亦樂乎，自己有自己空間，感覺係好樂天嘅。。。
點知，天使真係天使，我嘅小女神竟然好似做戲嘅女角咁向佢伸出友情之手，同佢傾計，唔俾人蝦佢，雖然條友都係只係掛住自己個鼻孔暢通程度，但佢呢個行為真係震撼到我深深處，完美嘅小女孩呀！！！
受佢影響之下，我都開始向呢位淘金者伸出友情之手，一齊玩一齊笑，慢慢唔知點解，我做左佢爸爸，女神自然就做左佢媽媽，大家一齊努力照顧鼻屎仔，日子過得太開心。當然，縱使係咁，可能大家都仲細，不知愛為何物，關係可以叫做友達以上，但就無再所謂進一步。。。。
可惜，幸福嘅時間過得特別快，佢，竟然一年都未夠就要去外國讀書。我就好似個傻仔咁第一次感受到離別嘅痛，我記得佢都好唔開心，但無自信嘅我唔會知道佢係因為我，定因為要離開大家而唔開心，總之最後一日我記得放學送佢上校車之後我喊到豬頭咁。。。好苦好苦。我嘅淡淡初戀以為就咁樣完結左。
大個左直到中學，我都不時諗起佢，只係屬於我同佢之間嘅秘密(小一就做人老豆老母喎)，雖然覺得係自作多情，佢一早就唔記得我啦應該，但對我作為一個毒撚總係忘不了嘅一段時光，永遠都係咁甜。
到好似中四時，突然有次小學同學聚會，竟然知道佢返左黎香港亦都會出席。我當年又無乜特別大期望，因為我係覺得只有我自己記得，咁多年無見乜都唔同晒啦。。。係！我估中左，真係唔同晒，由一個可人兒搖身一變，變左TB look....u 原來是個boy？好彩，原來只係外國mk look, 但已經同當年好大出入。不過靚樣依然，只係打扮太唔女性化。我地當然有交談，但當然無提以前細個啲野啦，就好似初相識嘅朋友咁，客客氣氣。。。回憶，我自己有就夠了。呢次聚會就成班嘻嘻哈哈咁就完了。。。
之後，到我去左外國讀書，期間返黎渡假，又黎多次小學同學聚會。因聚少離多，呢次我叫埋香港個女友一齊去 (係，LD撚)，原來佢亦都已經返左黎香港做野定居。嗰次一見，天呀！竟然變返100%女人，留長左頭髮，眼大大閃閃發光咁，好斯文。。。唯一奇怪嘅係點解咁細粒嘅，同我印象中個大細好大出入，細想先記得原來係自己大粒左，話晒男仔嘛。
本來大家相安無事有傾有講，直到我女友黎到(佢遲黎join)，我突然見佢面色一沉，由我女友黎左之後，佢就無乜再係聚會上講野，若有所思咁，期間就有另一個男同學不斷安慰佢咁同佢講野(佢地好似本身frd底，不過有啲兵feel)。。。。嗰個年紀，縱使我仲未成魔，但已經知發生乜事。原來佢一路都記得我？原來我係佢心目中唔係閒人？可惜我已經心有所屬，我只可以當無事發生。之後大家食完飯，搵地方食塘水，佢就話有事要走先。睇住佢心痛住咁走，連望都唔望吓我(本來之前仲傾得好地地)，當然嗰個兵同學即刻跟佢走，走嘅時候對我嘅眼神不懷好意咁(做乜鳩)。。。我係有啲開心又有啲啲痛，開心嘅係原來我地係有愛過，痛嘅係點解我咁遲先知。。。。嗰次聚會後，我就再無見過佢，佢就好似消失左咁，後黎fb大家add左，見佢結埋婚生左幾個細路好幸福(老公當然唔係隻兵啦，挑)，係開心嘅。雖然呢段畫時空嘅愛發覺得太遲，但我都好感激佢曾經鍾意過我，因為我都幾樣衰又無乜過人之處，總之係好嘅回憶啦，係對我黎講幾特別嘅體驗，我嘅第一次可以橫跨超過十年，都咪話唔奇妙。
